كيف تسوي كابشن عربي في دافنشي ريزولف — خطوة بخطوة

شرح كامل لإضافة كابشن عربي متحرك في DaVinci Resolve: تفريغ الصوت، تقسيم الكلمات، اختيار القالب، والحركة — مجاناً.

الكابشن صار أساس أي ريل أو فيديو قصير: أغلب الناس تشوف الفيديو بدون صوت، والكابشن هو اللي يخليهم يكملون. في هذا الشرح نسوي كابشن عربي احترافي داخل دافنشي ريزولف من البداية للنهاية.

1. جهّز التايم لاين

افتح مشروعك في صفحة Edit، وتأكد إن مقطع الكلام على التايم لاين والصوت واضح. لو فيه موسيقى عالية، نزّل صوتها شوي قبل التفريغ عشان النص يطلع أدق.

2. فرّغ الكلام لنص

بدل ما تكتب كل كلمة بيدك، استخدم تفريغ تلقائي. أداة O Caption المجانية تفرّغ صوت التايم لاين كلمة كلمة على جهازك نفسه بمحرك Whisper، بدون رفع الفيديو لأي مكان. ولو عندك ملف SRT جاهز، تقدر تستورده بدل التفريغ.

3. حدد كم كلمة في كل كابشن

للريلز السريعة: كلمة إلى ثلاث كلمات في كل كابشن تخلي العين تلحق الكلام. للفيديوهات الطويلة أو الشرح: من ثلاث إلى ست كلمات أريح للقراءة.

4. راجع النص

حتى أفضل تفريغ يغلط في كلمة أو اثنتين، خصوصاً الأسماء واللهجات. راجع كل سطر وصحّحه، وانقل الكلمة اللي طاحت في السطر الغلط للسطر اللي قبله أو بعده.

5. اختار القالب والحركة

القالب يحدد الخط واللون والإطار. حركة الدخول والخروج (ظهور، نطّة، انزلاق، زوم…) تعطي الكابشن حياة. لا تبالغ: حركة وحدة واضحة أحسن من خمس حركات مزعجة.

6. أضف للتايم لاين

الكابشن ينزل على تراك جديد لحاله، وكل سطر Text+ عادي تقدر تعدّل نصه وشكله من الإنسبكتر بعدين.

شروحات ثانية